ពេលព្រឹកឡើង ហេតុអ្វី បានជាយើង មានដង្ហើមមិនល្អ?

ខ្យល់ដង្ហើមមិនល្អ វាមាន ឈ្មោះផ្លូវការ ជាភាសាអង់គ្លេសថា “Halitosis” ប៉ុន្តែ មនុស្សភាគច្រើន ហៅវាថា " ដង្ហើមអាក្រក់ ឬ ស្អុយមាត់! ^_^ " ។ មនុស្សមួយចំនួន មានដង្ហើមអាក្រក់ ជាញឹកញាប់ ធ្វើអោយ អ្នកផ្សេងទៀត ស្ទើរតែទទួលយកមិនបាន។

អាហារខ្លះ ដូចជា ខ្ទឹមស ខ្ទឹមបារាំង សាច់គោ សាច់ត្រី ឬ សាច់ជ្រូក... (ផ្សេងៗមួយចំនួនទៀត) ត្រូវបាន គេដឹងថា អាចបណ្តាលឱ្យ មានដង្ហើមអាក្រក់។ លក្ខណបែបវេជ្ជសាស្ត្រ ដូចជា ការធាត់ជ្រុល និង ទម្លាប់នៃការរស់ នៅដូចជា ការជក់បារី និង ​​ការផឹកស្រា ត្រូវបានគេដឹងថា ជាមូលហេតុ នៃដង្ហើមអាក្រក់ផងដែរ។

ទោះបីជា អ្នកមានទម្លាប់រស់នៅ ដែលធ្វើអោយមានសុខភាពល្អ និង ជៀសវាងអាហារ ដែលបង្កអោយ មានក្លិនមាត់ ក៏ដោយ អ្នកប្រហែលជា កត់សម្គាល់ ថាពេលខ្លះអ្នកក្រោកពីដេកពេលព្រឹក បើទោះបីជា អ្នកបានដុសធ្មេញ របស់អ្នកនៅ ពេលយប់ក៏ដោយ មាត់នៅតែមានធុំក្លិន ក្លិននេះត្រូវបានគេហៅថា "ដង្ហើមពេលព្រឹក" ។ ដង្ហើមពេលព្រឹក មិនមែនជា រឿងចម្លែកទេ តែមានហេតុផល មួយចំនួន ដែលអ្នកមិនមាន អារម្មណ៍ស្រស់ថ្លា ក្រោយក្រោកពីដំណេក។

ប្រសិនបើ វេជ្ជបណ្ឌិតរបស់អ្នក ធ្លាប់បានចេញវេជ្ជបញ្ជាថ្នាំអង់ទីប៊ីយូទិច សំរាប់អ្នក នោះអ្នក ប្រហែល ជាធ្លាប់លឺអំពីបាក់តេរី។ បាក់តេរីមួយចំនួនដែលគេហៅថា "បាក់តេរីបង្ករោគ" អាចធ្វើឱ្យយើងឈឺយ៉ាងធ្ងន់ធ្ងរ ហើយយើង ត្រូវការប្រើថ្នាំដើម្បី សម្លាប់វា ។

ចំនែក បាក់តេរីប្រភេទ ខ្លះផ្សេង ទៀតនោះ គឺ បាក់តេរីល្អ និង ចាំបាច់សម្រាប់ ការរស់រាន មានជីវិត របស់យើង។ បាក់តេរីទាំងនោះ គឺ​ រស់នៅអចិន្ត្រៃយ៍ នៅផ្នែកផ្សេងៗ នៃរាងកាយ របស់យើង។ ពួកវាជួយយើង ឱ្យរំលាយអាហារ និង ការពារយើង ពីបាក់តេរីអាក្រក់(បង្ករោគ)។ បាក់តេរីល្អអាច រកឃើញនៅក្នុងពោះវៀន របស់យើង លើស្បែក និង នៅក្នុងមាត់របស់យើង។

បាក់តេរីក្នុងមាត់ គឺ​ ជាមូលហេតុមួយ នៃ​ក្លិនដង្ហើមពេលព្រឹក។ បាក់តេរី ដែលមានប្រយោជន៍ ដែលរស់នៅក្នុងទឹកមាត់ និង មាត់របស់យើង នៅពេលយប់វាផលិតឧស្ម័ន ដែល បណ្តាលឱ្យភាគល្អិតអាហារជាប់ ដែលនៅក្នុងច្លោះធ្មេញ ឬ ជាប់​នឹងអញ្ចាញ បញ្ចេញសារធាតុ ក្លិនស្អុយ នៅពេលដែលវារលាយ។

កត្តាមួយទៀត ដែលរួមចំណែក ដល់ក្លិនដង្ហើមពេលព្រឹក​ គឺ​​ មាត់ស្ងួត។ នៅពេលដែល អ្នកគេងលក់ ការផលិតទឹកមាត់ថយចុះ។ នេះបង្កើតបរិយាកាស ដែលអនុញ្ញាត​ឱ្យមានបាក់តេរីកាន់តែច្រើនទ្វេរដង នៅក្នុងមាត់។